ជាទូទៅនៅមុនពេលបុណ្យចូលឆ្នាំចិន ១សប្ដាហ៍ គឺប្រជាជនចិន ឬខ្មែរសែស្រឡាយចិន រមែងធ្វើពិធីដកជើងធូប ដែលនឹងប្រព្រឹត្តិទៅនៅថ្ងៃទី ១៨ ខែមករា ខាងមុខនេះ។ តើពិធីដកជើងធូបមានឥតន័យដូចម្ដេច? តើសែនដកជើងធូបបែបណាឲ្យត្រូវតាមក្បួនរបស់ចិន?។
ចង់ដឹងច្បាស់អំពីបញ្ហានេះ លោកគ្រូចិនសែពូកែទាយឆុតល្បីល្បាញនៅភ្នំពេញ កុក ឡុង នឹងបកស្រាយដូចខាងក្រោមនេះ៖
ពិធីសែនដកជើងធូប គឺជាពិធីមួយ នៃការជូនដំណើរទេព្តាចង្ក្រាន្តបាយឡើងឋានសួគ៌ ដើម្បីទូលព្រះឥន្ទអំពីជីវភាពនៃគ្រួសារនិមួយៗ។
ដូច្នេះការសែនដកជើងធូប គឺជាការយកចិត្ត (សូកប៉ាន់) ដល់ទេព្តាឆ្នាំចាស់ឲ្យទូលព្រះឥន្ទថា ផ្ទះនេះបានគោរពទេព្តាខ្លាំងណាស់ ម៉្លោះហើយទេព្តានឹងជូនពរឲ្យផ្ទះនេះរកស៊ីមានបាន។ «ជនជាតិចិនពេលខ្លះគេសែនខ្លាំងមាន១តុ ២តុ ដល់១០តុក៏មានដើម្បីបង្ហាញពីឥទ្ធិពលដល់ទេព្ដា ឲ្យទេព្តាជួយចម្រុងចម្រើន។»
និយាយមួយបែបទៀតការដកជើងធូប ១ឆ្នាំមានម្ដង ក៏ចង់កុំឲ្យជើងធូបពេញកំប៉ុង ដែលបង្កឲ្យមានហានិភ័យ នៃគ្រោះអគ្គីភ័យជាដើម។
ឆ្នាំណាឆុងនៅក្នុងពិធីសែនដកជើងធូប? មនុស្សដែលមានឆ្នាំម្សាញ់ វក កុរ ឆុងមិនអាចសែនដាក់ម្ហូប និងស្រាមុនបាននោះទេ សម្រាប់ការសែនដកជើងធូបឆ្នាំនេះ។ តែអាចធ្វើក្រោយពិធីសែនដកជើងធូបបាន។ ប៉ុន្ដែឆ្នាំផ្សេងៗអាចសែនជំនួសបានធម្មតា។
អំពីវិធីដកជើងធូប និងការអុជធូប
ពិធីដកជើងធូបក៏មានការរៀបចំដូចខ្មែរដែរមុនដកជើងធូប គឺធ្វើពិធីក្រុងពាលី។ ឯចិនគ្រាន់តែអុចធូបមួយដើមធំ និងផ្លែឈើមួយមុខ ជម្រាបជូនបារមីជំនាងផ្ទះ ទេព្តាចង្ត្រាន្តបាយ និងដូនតា ដោយប្រាប់ថានឹងត្រូវធ្វើការដកជើងធូបហើយ ហើយនៅពេលធូបមួយដើមនេះឆេះអស់ ១ភាគ៣ គឺចាប់ផ្ដើមដកធូប។
ការអុជធូបសែន ចំពោះជំនាងផ្ទះ អុជធូប ៥សសៃ, សែនទេព្តា និង ដូនតា គឺអុជធូប ៣សសៃ។
អំពីកំប៉ុងជើងធូប
កំប៉ុងជើងធូបត្រូវដាក់ដីខ្សាច់១ដៃ ផេះ៧០% អង្ករ១០% ហើយស្វែងរកកាក់ ដាក់បញ្ឈរ ដែលមានរូបស្ដេច (ប្រទេសណាក៏បាន) បន្ទាប់មកដាក់ផេះពីលើ គឺមានធូបចំនួន ១៥ដើម ដូចបានជម្រាបជូនខាងលើ។
វេលានៃការសែនឲ្យត្រូវតាមក្បួនចិន
មនុស្សកើតឆ្នាំជូត ឆ្លូវ រោង ម្សាញ់ វក រកា គឺសែនមុនម៉ោង១១ព្រឹក ថ្ងៃទី១៨ ខែមករា។ មនុស្សដែលកើតឆ្នាំខាល ថោះ មមី មមែ ច និង កុរ គឺអាចសែនក្រោយម៉ោង ១១ ព្រឹក ឬមុនម៉ោង ១រសៀល។ អ្នកដែលសែនទាំងឡាយ ក៏ត្រូវហៅឈ្មោះទេព្ដាផង ដែលមានព្រះនាមថា ជា ស៊ីវ ដែលជាទេព្តាឆ្នាំចាស់ ឆ្នាំកុរ ដែលនឹងឡើងទៅជួបព្រះឥន្ទដើម្បីទូលថ្វាយពីកិច្ចការឆ្នាំចាស់ ត្រៀមផ្លាស់ចូលឆ្នាំថ្មី។
ការបើកភ្លើងដើម្បីទទួលពន្លឺជ័យ
នៅអំឡុងពេលសែនត្រូវបើកភ្លើងឲ្យភ្លឺ ពេញផ្ទះ ដើម្បីទទួលបានពន្លឺភ្លឺស្វាងនៅក្នុងផ្ទះ ប៉ុន្ដែតោងប្រយ័ត្នអំពីអគ្គីភ័យផងដែរ។
ចំណាំ៖ ចំពោះជើងធូបដែលបានដក ឬផេះក្នុងកំប៉ុងដែលបានចាក់ចេញប្ដូរថ្មី គឺកុំចោលធុងសម្រាម ព្រោះជាទ្រព្យឆ្នាំចាស់ អាចយកទៅចោលក្នុងថោផ្កាមុខផ្ទះ ឲ្យក្លាយជាជី នោះទ្រព្យនឹងកើនឡើងទ្វេរដង៕
x
ប្រភព៖ sabay
